មិនសសើរម៉េចបាន សង្វៀនបញ្ជល់មាន់មួយកន្លែង កន្លងមកដែលល្បីថា សមត្ថកិច្ចខណ្ឌឬស្សីកែវ តែង តែបិទភ្នែកបិទត្រចៀកមិនអើពើព្រោះតែមានប្រយោជន៌ចូលហោប៉ៅខ្លួននោះ ស្រាប់តែនៅពេលនេះ
គេឃើញកម្លាំងសមត្ថកិច្ចខណ្ឌចុះបង្ក្រាបធ្វើឲ្យអ្នកលេងទាំងអស់រត់បាតជើងសព្រាត ។

គួររំលឹកថា កាលពីរសៀលថ្ងៃទី១ ខែគុម្ភៈ ឆ្នាំ ២០២០ កន្លងទៅនេះ សមត្ថកិច្ចខណ្ឌឬស្សីកែវ ក្រោម
ការដឹកនាំបញ្ជាផ្ទាល់ពីរូបលោក ប្រាជ្ញ សីហា អភិបាលរងខណ្ឌ និងរូបលោកវរៈសេនីយ៌ទោ ហ៊ាង ថារ៉េត អធិការនគរបាលខណ្ឌ បានដឹកនាំកម្លាំងចុះបង្ក្រាបទីតាំងសង្វៀនជល់មាន់ និងបាញ់អាប៉ោង ដែលស្ថិតនៅក្នុងដីឡូតិ៍មួយកន្លែង ក្នុងភូមិខ១ សង្កាត់ច្រាំងចំរេះទី ២ ខណ្ឌឬស្សីកែវ រាជធានី ភ្នំពេញ ។

នៅក្នុងសកម្មភាពបង្ក្រាននេះផងដែរ សមត្ថកិច្ចបង្ក្រាបបានតែមនុស្សម្នាក់ និងម៉ូតូមួយគ្រឿងប៉ុណ្ណោះ ព្រោះតែគាត់នោះរត់អត់ទាន់គេ ក្រៅពីនោះអ្នកលេងជាច្រើនរត់ចែកជើងគ្នាឲ្យសព្រាត មើលទៅ ហាក់បីដូចជាសត្វឈ្លូលផ្អើលខ្លាយ៉ាងអញ្ចឹង ។

ទោះជាយ៉ាងណា ប្រជាពលរដ្ឋជាច្រើន ដែលបានឃើញហេតុការណ៌នេះ មានការសាទរពេកក្រែ ព្រោះការដែលមនុស្សជាច្រើនកាន់តែឈ្លក់វង្វេងទៅនឹងល្បែងពាលានោះ គឺវាអាចបង្កឲ្យកើតឡើងនូវ អំពើ ចោរកម្ម លួច ឆក់ ប្លន់ ជាពិសេសដើម្បីឲ្យមនុស្សកាន់តែហ៊ាន គឺអាចឈានទៅដល់ការប្រើ ប្រាស់ថ្នាំញៀនផ្សេងៗ ទៀតផង ។

ករណីនេះប្រសិនបើអាជ្ញាធរដែនដីខណ្ឌនៅតែព្រងើយកន្តើយទេនោះ គឺវាអាចធ្វើឲ្យពលរដ្ឋកាន់ តែរស់នៅក្នុងទុក្ខព្រួយរហូត ។

សម្រាប់ការបង្ក្រាបមួយនេះផងដែរ ប្រជាពលរដ្ឋជាច្រើន បានលើកឡើងថា ពួកគាត់សង្ឃឹមថា សូម កុំឲ្យដូចពាក្យគេនិយាយថា រាល់សកម្មភាពដែលចុះ គឺជាចេតនា គោះទឹកហៅត្រីឲ្យសោះ ដើម្បីបង្ហាញ ឲ្យពលរដ្ឋមានជំនឿជឿជាក់បាន ពលរដ្ឋសង្ឃឹមថា ទីតាំងខាងលើនេះ គឺនឹងមិនអាចបើកលេងបន្តទៀត នោះឡើយ ក្នុងពេលឆាប់ៗនេះ ៕