ប្រជាពលរដ្ឋរស់នៅអាស្រ័យតាមបណ្តោយផ្លូវចាប់ផ្តើមដេកមិនលក់បក់មិនល្ហើយទៀតហើយ ខណៈដែលក្បួន ម៉ូតូដឹកឈើផ្តើមធ្វើសកម្មភាពឲ្យគគ្រឹកគគ្រេងរញ្ជួយប្រតិព្វីសារជាថ្មី អស់លោកអាជ្ញាធរដែនដី និងសមត្ថកិច្ចជំ នាញពាក់ព័ន្ធដែលមានតួនាទី បែរជារក្សាភាពស្ងៀមស្ងាត់ យ៉ាងចម្លែក ។

តាមដែលប្រភពពីពលរដ្ឋលើកឡើងបានឲ្យដឹងថា នៅថ្ងៃសៅរ៍ ទី៥ ខែមីនា ឆ្នាំ២០២២នេះ សកម្មភាពក្បួនម៉ូតូ កែច្នៃដឹកឈើយ៉ាងអនាធិបតេយ្យ ដែលស្ថិតនៅក្នុងឃុំក្រញូងសែនជ័យ ស្រុកស្នួល ខេត្តក្រចេះ ចាប់ផ្តើមធ្វើសកម្ម ភាពដូចក្បួនប្រតិភូឡើងវិញ ដែលដឹកឆ្លងកាត់ផ្សារកាបីនិងឆ្លងកាត់ជ្រោះជ្រៅ រួចហើយក៏បន្តទៅព្រំប្រទល់កម្ពុជា វៀតណាម ។

តាមប្រភពពីប្រជាពលរដ្ឋបន្តថា ពួកឈ្មួញទាំងនោះបានដឹកចូលតាមច្រករបៀងដែលបានគេហៅថា ង៉ាំ(បេន ឌាំង) ដើម្បីយកទៅលក់ឱ្យមេឈ្មួញវៀតណាមបន្ត ហើយសកម្មភាពដឹកឈើយ៉ាងរង្គើដីជារៀងរាល់ថ្ងៃបែបនេះ ក៏ពុំទាន់ឃើញមានអស់លោកសមត្ថកិច្ច ឬអាជ្ញាធរពាក់ព័ន្ធណាចុះអើពី ឬក៏បង្ក្រាបហាមឃាត់អ្វីសោះឡើយ ក្លាយជាមន្ទិលមិនអស់ចិត្តពីប្រជាពលរដ្ឋលើកឡើងថា គេសង្ស័យថាអស់លោកមួយចំនួននោះ ត្រូវថ្នាំសណ្តំពី ក្រុមពួកឈ្មួញដឹកឈើទាំងនោះហើយក៏មិនដឹង បានជាសកម្មភាពដឹកឈើយ៉ាងរង្គើរដីបែបនេះហើយ អស់ លោកមន្ត្រីជំនាញទាំងអស់នោះ ដេកលង់លក់យ៉ាងមានក្តីសុខ ហាក់បីដូចគ្មានអ្វីកើតឡើងសោះ។

តែបើទោះជាយ៉ាងណាក្តី ប្រជាពលរដ្ឋជាច្រើន សំណូមពរថ្នាក់ដឹកនាំកំពូលៗក្នុងខេត្តក្រចេះ មេត្តាជួយពង្រឹង សមត្ថកិច្ច និងអាជ្ញាធរពាក់ព័ន្ធនៅតាមគោលដៅនិមួយៗឲ្យបានខ្លាំងឡើងវិញផងទាន ព្រោះពេលនេះបទល្មើស បំផ្លាញ ធនធានធម្មជាតិ កំពុងរីករាលដាលកើតឡើងខ្លាំងណាស់ ៕